Bakının Binəqədi rayonunda, Bakı Beynəlxalq Avtovağzal Kompleksinin yaxınlığında 31 ton dizel yanacağı daşıyan yük avtomobilində yanğın baş verib.
Hadisə ilə bağlı Fövqəladə Hallar Nazirliyinin “112“ qaynar telefon xəttinə məlumat daxil olduqdan dərhal sonra əraziyə Dövlət Yanğından Mühafizə Xidmətinin qüvvələri cəlb olunub.
Yanğınsöndürənlərin operativ müdaxiləsi nəticəsində “Mercedes“ markalı yük avtomobilinin kabinəsində başlayan alovun qoşqudakı yanacaq çəninə keçməsinin qarşısı alınıb. Beləliklə, 31 ton dizel yanacağı olan çənin alışması və ağır fəsadlar törətməsi baş verməyib.
Yanğın nəticəsində avtomobilin yalnız kabinə hissəsi yanıb. Hadisə zamanı xəsarət alan olmayıb.
