Azərbaycanda bəzi hərbi qulluqçuların “leytenant” hərbi rütbəsində xidmət müddətinin dəyişdirilməsi təklif olunur.
Təklifə əsasən, təhsil müddəti 5 il olan xüsusi təyinatlı hərbi təhsil müəssisələrini bitirən hərbi qulluqçular üçün “leytenant” rütbəsində olma müddəti 2 il müəyyən ediləcək.
Bundan əlavə, magistratura və rezidenturanı bitirmiş, həmçinin doktoranturada təhsilini başa vuraraq elmi dərəcə almış zabitlərin hərbi rütbədə xidmət müddətinin hər təhsil səviyyəsi üzrə bir dəfə 1 il azaldılması nəzərdə tutulur.
Aviasiyanın uçuş heyətində və sualtı gəmilərdə xidmət edən hərbi qulluqçular üçün “leytenant” rütbəsində olma müddətinin isə 1 il olması təklif edilir.
Hazırda qüvvədə olan qaydalara əsasən, digər hərbi qulluqçular üçün “leytenant” rütbəsində xidmət müddəti 3 il, aviasiyanın uçuş heyətində və sualtı gəmilərdə xidmət edənlər üçün isə 2 ildir. Təhsil müddəti 5 il və daha çox olan xüsusi təyinatlı təhsil müəssisələrini bitirənlər üçün bu müddət hazırda 1 il müəyyən edilib.
Dəyişikliklərlə bağlı layihə Milli Məclisin Müdafiə, təhlükəsizlik və korrupsiya ilə mübarizə komitəsinin müzakirəsinə təqdim edilib.
