Ermənistan Rusiyanın 102-ci hərbi bazasının ölkə ərazisindən çıxarılmasının zəruriliyi ilə bağlı Rusiyaya rəsmi müraciət etməyib.
Ermənistan Təhlükəsizlik Şurasının katibi Alen Simonyan jurnalistlərə açıqlamasında bildirib ki, hərbi bazanın çıxarılması ilə bağlı bəyanatlar Rusiya tərəfindən səsləndirilir.
“Hərbi baza ilə bağlı bəyanatlar Rusiya tərəfindən gəlir, biz onlara bir kəlmə də deməmişik. Baş nazir Nikol Paşinyanın ifadə etdiyi kimi, istəyirlər qalsınlar, istəyirlər getsinlər”, – Simonyan deyib.
O qeyd edib ki, məsələ ilə bağlı danışıqlar başlanarsa, Ermənistan öz mövqeyini bildirəcək.
Simonyan Rusiyadan Ermənistana tədarük olunan qazın qiymətinin mümkün artırılmasına da münasibət bildirib. Onun sözlərinə görə, Ermənistan enerji təhlükəsizliyi məsələlərində alternativ mənbələr axtarmağa davam edəcək.
“İqtisadi təhlükəsizliyin bütün mümkün məsələlərində Ermənistan alternativi, balansı seçib və seçəcək, bu taktika davam etdiriləcək. Biz bir ölkədən asılılığı digərindən asılılıqla əvəz etmək niyyətində deyilik. Biz qazı mümkün olan hər yerdən almaq niyyətindəyik. Əgər Rusiya bizə qaz tədarük edəcəksə – qazı Rusiyadan, Azərbaycan tədarük edəcəksə – Azərbaycandan, İran – İrandan alacağıq. Əgər Türkiyənin hər hansı bir yerindən qaz almaq imkanı yaranarsa, eyni zamanda ondan da alacağıq. Kim deyib ki, bir cibdən çıxıb digərinə tullanmaq lazımdır?”, – o bildirib.
Rusiya qazının Ermənistana daha ucuz başa gəldiyi barədə iddiaları şərh edən Simonyan deyib: “Bəs kim deyib ki, qazın qiyməti daha ucuzdur? Bəs kim deyib ki, qazın qiyməti yalnız dollarla ölçülür? Siz görürsünüz ki, qazdan siyasi valyuta kimi istifadə olunur”.
Rusiya və Ermənistanın qazın qiymətində mümkün dəyişikliklə bağlı rəsmi danışıqlar aparıb-aparmadığı barədə suala cavabında isə Simonyan bildirib ki, məsələ ictimai müzakirələr və səsləndirilən fikirlər fonunda gündəmdədir.
