Milli Məclis İT, süni intellekt, kibertəhlükəsizlik və startap sahəsində çalışanlar üçün mühüm vergi güzəştlərini nəzərdə tutan qanun layihəsini III oxunuşda qəbul edib.
Yeni qanuna əsasən, bu sahələrdə fəaliyyət göstərən fiziki və hüquqi şəxslərin əldə etdikləri gəlirlər vergidən azad olunacaq. Güzəşt ixrac edilən xidmətlərdən əldə olunan gəlirlərə şamil ediləcək və vəsaitlərin Azərbaycan banklarına köçürülməsi tələb olunacaq.
Bundan başqa, son 24 ayda Azərbaycanda vergi ödəyicisi olmayan xarici mütəxəssislər və xaricdən ölkəyə qayıdaraq bu sahələrdə çalışan azərbaycanlılar əməkhaqlarından 0 faiz gəlir vergisi ödəyəcəklər.
Qanun frilanserlər və “rəqəmsal köçərilər” (digital nomads) üçün də yeni imkanlar yaradır. Xarici şirkətlərlə məsafədən çalışan şəxslər vergi uçotuna düşdükdən sonra nəzərdə tutulan güzəştlərdən yararlana biləcəklər.
Həmçinin startaplara və innovasiya şirkətlərinə investisiya qoyan şəxslər üçün də vergi stimulları tətbiq ediləcək.
