Azərbaycanda hərbi xidmətdən boyun qaçırma faktları üzrə 5 cinayət işi başlanılıb.
Hərbi Prokurorluğun məlumatına görə, bəzi çağırışçılar müxtəlif xəstəlikləri, o cümlədən özlərinə xəsarət yetirməklə psixi və nevrotik pozuntuları simulyasiya edərək həqiqi hərbi xidmətdən yayınmağa çalışırlar. Bəzi hallarda isə tibbi göstəriş olmadan cərrahi əməliyyatlar etdirirlər.
Bildirilib ki, cari ilin iyul və oktyabr çağırışları dövründə bu kimi 5 fakt üzrə cinayət işi başlanılıb. İşlər Gəncə şəhər idarəsində, İmişli rayon şöbəsində, eləcə də Qobustan və Şuşa rayon bölmələrində hərbi qeydiyyatda olan çağırışçılar barəsində araşdırılır. Cinayət işləri Cinayət Məcəlləsinin 321.1-ci maddəsi ilə başlanılıb və hazırda istintaq davam edir.
Hərbi Prokurorluq xatırladıb ki, Cinayət Məcəlləsinin 321.1-ci maddəsinə əsasən, üzrlü səbəb olmadan tibbi müayinəyə, müddətli həqiqi hərbi xidmətə, toplanışlara və səfərbərlik üzrə hərbi xidmətə çağırışa gəlməmək hərbi xidmətdən boyun qaçırma hesab olunur və cinayət məsuliyyətinə səbəb olur.
