Azərbaycanda qeyri-sabit hava şəraiti noyabrın 9-u axşamadək davam edəcək. Bu müddətdə temperaturun tədricən 5-10 dərəcə enəcəyi gözlənilir.
Milli Hidrometeorologiya Xidmətinin məlumatına görə, Bakıda və Abşeron yarımadasında noyabrın 5-i axşamdan 9-u axşamadək fasilələrlə yağış yağacaq. Yarımadanın ayrı-ayrı ərazilərində yağışın qısamüddətli intensivləşəcəyi və şimşək çaxacağı ehtimal olunur.
Noyabrın 5-i günün ikinci yarısından başlayaraq Azərbaycanın şimal və qərb rayonlarında hava şəraiti qeyri-sabit olacaq, fasilələrlə yağıntı düşəcək. Ayrı-ayrı ərazilərdə leysan xarakterli intensiv yağış, şimşək və dolu gözlənilir. Dağlıq ərazilərdə qar yağacağı, noyabrın 5-i axşam və 6-sı gecə yağıntıların bir qədər güclənəcəyi ehtimal edilir.
Yağıntılarla əlaqədar çaylarda sululuğun artacağı gözlənilir. Böyük Qafqazın və Lənkəran-Astara bölgəsinin bəzi çaylarından qısamüddətli daşqın və sel keçməsi istisna olunmur.
