Tərtər rayonunda minik və yük avtomobilinin toqquşması nəticəsində iki nəfər həyatını itirib.
Fövqəladə Hallar Nazirliyinin (FHN) məlumatına görə, qəza rayonun Təzəkənd kəndi ərazisində baş verib. Hadisə ilə bağlı “112” qaynar telefon xəttinə daxil olan məlumat əsasında əraziyə dərhal FHN-in Qarabağ Regional Mərkəzinin xilasediciləri cəlb olunub.
Müəyyən edilib ki, “Mercedes” markalı minik avtomobili “MAN” markalı yük avtomobili ilə toqquşub. Nəticədə minik avtomobilində olan iki nəfərin meyiti deformasiyaya uğramış nəqliyyat vasitəsində sıxılmış vəziyyətdə qalıb.
Xilasedicilər xüsusi avadanlıqlar vasitəsilə Bərdə rayonunun Qaraqoyunlu kənd sakinləri – 1962-ci il təvəllüdlü Adil Əhmədov və 1973-cü il təvəllüdlü Elza Əmirovanın meyitlərini avtomobildən çıxararaq aidiyyəti üzrə təhvil veriblər.
Faktla bağlı araşdırma aparılır.
