Gəncə və Samuxda son günlər yas mərasimlərində baş verən kütləvi qida zəhərlənmələrinin səbəbinin lavaş olduğu ehtimal edilir.
Azərbaycan Qida Təhlükəsizliyi Agentliyinin (AQTA) məlumatına görə, ilkin epidemioloji araşdırmalar zamanı hər üç mərasimdə istehlak olunan qidalar təhlil edilib və ortaq risk faktoru kimi lavaş müəyyənləşdirilib.
Araşdırmalar göstərib ki, yas mərasimlərində istifadə olunan lavaşlar qeyri-qanuni şəkildə ev şəraitində hazırlanaraq satışa çıxarılıb. Məhsuldan nümunələr götürülüb, laborator müayinələr və istehsal şəraiti ilə bağlı araşdırmalar davam etdirilir. Nəticələrlə bağlı əlavə məlumat veriləcək.
AQTA vətəndaşlara qida məhsullarını yalnız qeydiyyatdan keçmiş və təhlükəsizlik tələblərinə cavab verən istehsalçı və satış obyektlərindən almağı, mənşəyi məlum olmayan, ev şəraitində hazırlanan məhsulları istehlak etməməyi tövsiyə edib.
Xatırladaq ki, iyulun 12-də Gəncədə 7 nəfər, iyulun 14-də daha 3 nəfər, iyulun 15-də isə Samuxda 12 nəfər qida zəhərlənməsi diaqnozu ilə xəstəxanaya yerləşdirilmişdi.
