İİV-lə mübarizə proqramlarının maliyyələşdirilməsinin azalması dünyada xəstəliyin yeni epidemiyasına səbəb ola bilər.
Bu barədə BMT-nin İİV/QİÇS üzrə Birgə Proqramının (UNAIDS) yeni məruzəsində bildirilib.
Sənədə əsasən, 2025-ci ildə inkişaf məqsədləri üçün beynəlxalq yardım 23 %, İİV-lə mübarizə proqramlarının maliyyələşdirilməsi isə 18 % azalaraq 8,8 milyard dollardan 7,3 milyard dollara enib. Bu, son 20 ilə yaxın dövrdə qeydə alınan ən aşağı göstəricilərdən biri hesab olunur.
Maliyyə çatışmazlığı xüsusilə yoxsul ölkələrdə ciddi problemlər yaradıb. Bəzi ölkələrdə profilaktika proqramlarının 90 %-ə qədəri xarici maliyyə mənbələrindən asılı olub. Qoruyucu vasitələrin alınması və risk qrupları ilə iş üçün ayrılan vəsait isə 50-85 % azalıb.
BMT-nin məlumatına görə, 2025-ci ildə 1,2 milyon nəfər İİV-ə yoluxub, 570 min nəfər isə QİÇS-lə əlaqəli xəstəliklərdən həyatını itirib. Dünyada İİV daşıyıcısı olan 41 milyon nəfərdən təxminən 9 milyonu müalicə almır.
UNAIDS xəbərdarlıq edib ki, təcili tədbirlər görülməyəcəyi təqdirdə, 2030-cu ilədək yeni yoluxma hallarının sayı 3 milyonu keçə bilər.
Bununla yanaşı, qurum hesab edir ki, kifayət qədər maliyyə və dəstək təmin olunarsa, 2030-cu ilə qədər QİÇS üzərində qələbə qazanmaq hələ də mümkündür.
