Qazaxıstanın Manqistau vilayəti sahillərində, Xəzər dənizində keçirilən təlimlər zamanı hərbi qulluqçuların həlak olması ilə bağlı beş vəzifəli şəxs saxlanılıb.
Qazaxıstan Daxili İşlər Nazirliyinin məlumatına görə, saxlanılan şəxslər ağır nəticələrə səbəb olan xidmətə səhlənkar yanaşma və gəmi idarəçiliyi qaydalarının pozulmasında şübhəli bilinirlər.
Saxlanılanlar arasında Qazaxıstan Silahlı Qüvvələrinin Hərbi-Dəniz Qüvvələri Baş komandanının birinci müavini – qərargah rəisi, iki hərbi hissə komandiri, dəniz piyadaları bölüyünün və katerin komandirləri var.
Onların hamısı şübhəli şəxs qismində tanınıb və Aktau şəhər polis idarəsinin müvəqqəti saxlama təcridxanasına yerləşdiriliblər.
Qazaxıstan DİN-in hərbi istintaq bölməsi “Xəzər Qorğanı – 2026” təlimləri zamanı hərbi qulluqçuların həlak olması faktı üzrə məhkəməyəqədərki araşdırma aparır.
