Tovuz rayonunun Düz Cırdaxan kəndində ölümlə nəticələnən yol-nəqliyyat hadisəsi baş verib.
Hərəkətdə olan “Ford” markalı yüngül ticari avtomobilin sürücüsü idarəetməni itirib. Nəticədə avtomobil əvvəlcə yol kənarındakı elektrik dirəyinə, daha sonra isə ağaca çırpılıb. Hadisə nəticəsində elektrik dirəyi də aşıb və kəndin bir hissəsində elektrik enerjisinin verilişində fasilə yaranıb.
Qəza zamanı avtomobilin sürücüsü, Düz Cırdaxan kənd sakini, 25 yaşlı Fərid Tağıyev aldığı ağır xəsarətlərdən hadisə yerində dünyasını dəyişib.
Hadisə yerinə Fövqəladə Hallar Nazirliyinin xilasediciləri cəlb olunub. Xilasedicilər deformasiyaya uğramış avtomobildə sıxılmış vəziyyətdə qalan sürücünün meyitini xüsusi avadanlıqların köməyi ilə çıxararaq aidiyyəti üzrə təhvil veriblər.
Faktla bağlı araşdırma aparılır.
