Birinci Qarabağ müharibəsində itkin düşmüş hesab edilən və şəxsiyyəti müəyyənləşdirilmiş 474 mülki şəxsin laboratoriyalardan keçən sümük qalıqlarında müxtəlif həyati xəsarətlər aşkarlanıb. Bunlar arasında güllə və qəlpə, həmçinin küt alət xəsarətləri var.
Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin direktoru Ədalət Həsənov bildirib ki, Qarabağın işğaldan azad edilmiş ərazilərindən indiyədək Birliyə 913 itkin düşmüş şəxsə aid olduğu ehtimal edilən meyit qalıqları qəbul edilib.
Onun sözlərinə görə, skelet qalıqlarının məhkəmə-tibbi müayinəsi başa çatdıqdan sonra hər birindən, xüsusilə sağlam dişlərdən, bioloji nümunələr götürülərək şəxsiyyətin müəyyənləşdirilməsi üçün DTX-nin Genetik Araşdırmalar Mərkəzinə göndərilir.
Hazırda məhkəmə-molekulyar genetik ekspertizanın köməyi ilə Birinci Qarabağ müharibəsində itkin düşmüş 328 nəfərin şəxsiyyəti müəyyənləşdirilib.
Ədalət Həsənov qeyd edib ki, identifikasiya başa çatdıqdan sonra sümük qalıqları ailələrə təhvil verilir. İndiyədək 273 şəhidin meyit qalıqları Dövlət Komissiyasının tövsiyəsi və iştirakı ilə ailələrinə təhvil verilib və milli-dini ənənələrə uyğun dəfn olunub. Onlardan 225-i hərbçi, 48-i isə mülki şəxsdir.
Şəxsiyyəti müəyyənləşdirilmiş mülki şəxslər arasında 15 qadın və 2 azyaşlı da var.
