Xırdalan şəhərində nəqliyyat sıxlığının azaldılması və magistral yollara çıxışın asanlaşdırılması məqsədilə iki yeni tunelin tikintisi nəzərdə tutulur.
Azərbaycan Avtomobil Yolları Dövlət Agentliyinin məlumatına görə, layihələr “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində həyata keçiriləcək. Hər iki layihə proqramda nəzərdə tutulan 24 yol layihəsinin tərkib hissəsidir.
Hazırda Xırdalandan keçən dəmir yolu xətti şəhəri iki hissəyə ayırır. Keçidlərin məhdud olması sürücülərin əlavə məsafə qət etməsinə, bəzi küçələrdə sıxlığın yaranmasına və M-1, M-4 magistrallarına çıxışın çətinləşməsinə səbəb olur.
Birinci layihə çərçivəsində yeni tunelin və əlaqələndirici yolların tikintisi, mövcud yolların və yol qovşaqlarının yenidən təşkili planlaşdırılır. Bu, şəhərin müxtəlif hissələri arasında hərəkət imkanlarını genişləndirəcək və M-1, M-4 magistrallarına bağlantını yaxşılaşdıracaq.
İkinci layihə isə M-4 magistralından Xırdalanın mərkəzinə birbaşa nəqliyyat bağlantısının yaradılmasını nəzərdə tutur. Bunun üçün yeni tunel və müxtəlif səviyyəli yol ötürücüsü inşa ediləcək.
Layihələrin həyata keçirilməsi nəticəsində şəhərdaxili yollarla magistrallar arasında alternativ marşrutlar yaradılacaq. Bununla sürücülərin əlavə məsafə qət etməsinə ehtiyacın azalması, nəqliyyat axınının bölüşdürülməsi və şəhərin daxili küçələrində sıxlığın yüngülləşdirilməsi hədəflənir.
