Azərbaycan ədəbiyyatının görkəmli nümayəndəsi, Xalq şairi, dramaturq və ictimai xadim Nəriman Həsənzadə vəfat edib.
Bu barədə Mədəniyyət Nazirliyi məlumat yayıb.
1931-ci il fevralın 18-də Qazax rayonunun Poylu qəsəbəsində anadan olan Nəriman Həsənzadə uzun illər ədəbiyyat, mətbuat və dövlət idarəçiliyi sahələrində fəaliyyət göstərib. O, müxtəlif dövrlərdə “Ədəbiyyat və incəsənət” qəzetinin baş redaktoru, mətbuat və informasiya nazirinin birinci müavini, Azərbaycan Ədəbiyyat Fondunun İdarə Heyətinin sədri və Milli Aviasiya Akademiyasının Humanitar fənlər kafedrasının müdiri olub.
Şairin “Könlüm şeir istəyir”, “Yadına düşəcəyəm”, “Bir az möhlət istəyirəm ömürdən”, “Taleyin töhfəsi”, “Nuru paşa” və digər əsərləri Azərbaycan ədəbiyyatının dəyərli nümunələri hesab olunur. Onun əsərləri bir sıra xarici dillərə tərcümə edilib, poemaları və mənzum dramları əsasında tamaşalar hazırlanıb.
Nəriman Həsənzadə Azərbaycan ədəbiyyatı və mədəniyyətinin inkişafındakı xidmətlərinə görə “Əməkdar incəsənət xadimi”, “Xalq şairi” fəxri adlarına, “Şöhrət”, “Şərəf”, “İstiqlal”, “Heydər Əliyev” ordenlərinə və Heydər Əliyev Mükafatına layiq görülüb.
Allah rəhmət eləsin!
