Tərtərdə fərdi yaşayış evində baş vermiş yanğınla bağlı aparılan istintaq zamanı hadisənin qəsdən törədilmiş ikiqat qətl olduğu müəyyən edilib.
Baş Prokurorluğun məlumatına görə, cinayətin izlərini gizlətmək məqsədilə evə od vurulub. Hadisə nəticəsində evdə yaşayan Əsgər Səmədov və həyat yoldaşı Adilə Hüseynova öldürülüb, evdən isə külli miqdarda pul vəsaiti oğurlanıb.
İstintaqla müəyyən edilib ki, Vüqar Baxşəliyev avqustun 6-da həmin ünvandan pul vəsaitini ələ keçirdikdən sonra oğurluğun izlərini gizlətmək məqsədilə evi yandırıb və ər-arvadı qəsdən öldürüb.
Toplanmış sübutlar əsasında Vüqar Baxşəliyevin əməli Cinayət Məcəlləsinin qəsdən adam öldürmə ilə bağlı bir neçə ağır maddəsi ilə tövsif edilib. O, prokurorluq tərəfindən şübhəli şəxs qismində tutulub.
Cinayət işi üzrə istintaq Baş Prokurorluğun Kriminalistika və İnformasiya texnologiyaları idarəsində davam etdirilir.
