ABŞ Prezidenti Donald Tramp Danimarka və Qrenlandiya ilə ada ərazisində təhlükəsizliyin təmin edilməsi ilə bağlı razılaşma əldə olunduğunu açıqlayıb. Trampın sözlərinə görə, bu razılaşma ABŞ-yə Qrenlandiyada təhlükəsizlik və digər ehtiyaclara daimi nəzarət imkanı verəcək.
Tramp bildirib ki, ABŞ Qrenlandiyanın və özünün təhlükəsizliyini təmin etmək üçün adada “lazım olan hər şeyi” etmək imkanına malik olacaq. O, həmçinin Qrenlandiyada ABŞ-nin razılığı olmadan hərbi baza yaradılmasının, hərbi qüvvə yerləşdirilməsinin və müəyyən həssas investisiyaların qarşısının alınacağını deyib.
ABŞ Prezidenti Qrenlandiyada genişmiqyaslı hərbi mövcudluğun yaradılması ilə bağlı planların dərhal hazırlanacağını da açıqlayıb.
Danimarka və Qrenlandiya isə razılaşmanın onların suverenliyini və Qrenlandiya xalqının öz müqəddəratını təyinetmə hüququnu tanıdığını bildiriblər. Razılaşmanın gələn həftə imzalanması planlaşdırılır, bundan sonra sənəd Danimarka və Qrenlandiya parlamentlərinin təsdiqindən keçməlidir.
