Yeni tədris ilindən 48 ucqar kənd məktəbində distant təhsilə başlanılıb.
Bunu MÜTDA-nın direktoru Eşqi Bağırov İctimai Televiziyada yayımlanan “Pressinq” verilişində deyib. Onun sözlərinə görə, bu model 1 200 şagirdin təhsil imkanlarının yaxşılaşdırılmasına xidmət edir.
ötən tədris ilində distant təhsil modeli 8 məktəbdə tətbiq olunub. Yeni tədris ilindən isə məktəblərin sayı 48-ə çatdırılıb.
Bağırov qeyd edib ki, yaxın ərazidə alternativ məktəb olduğu və şagirdin əlavə nəqliyyata ehtiyac olmadan həmin məktəbdə təhsil ala bildiyi hallarda daşınma həyata keçirilmir. Alternativ məktəb olmadıqda isə şagirdlərin daşınması təşkil olunur.
Müəllim təminatı və digər əsas ehtiyacların qarşılanmasında çətinlik olan məktəblərdə isə kompüter və şəbəkə avadanlıqları quraşdırılaraq distant təhsil imkanları yaradılıb. Beləliklə, şagirdlərin başqa məktəbə getməsinə və ya daşınmasına ehtiyac qalmadan öz məktəblərində onlayn təhsil almaları təmin edilir.
Eşqi Bağırov bildirib ki, distant təhsil modeli tətbiq edilməsəydi, 1 200 şagird kadr təminatı, infrastruktur və ya daşınma ilə bağlı çətinliklərlə üzləşə bilərdi. Onun sözlərinə görə, modelin əhatə dairəsinin növbəti illərdə daha da genişləndirilməsi nəzərdə tutulur.
