Tbilisidə Azərbaycanın Ümummilli Lideri Heydər Əliyevin büstünü zədələməkdə şübhəli bilinən şəxs barəsində həbs qətimkan tədbiri seçilib.
Saxlanılan şəxsin 40 yaşdan yuxarı Ermənistan vətəndaşı olduğu və Gürcüstana turist kimi gəldiyi bildirilir. O, hazırda susmaq hüququndan istifadə edir.
Hadisə ilə bağlı istintaq Gürcüstan Cinayət Məcəlləsinin 187-ci maddəsinin birinci hissəsi ilə aparılır.
Saxlanılan şəxsin barəsində həbs qətimkan tədbiri seçilib. İlkin məhkəmə iclasının noyabrın 12-də keçirilməsi nəzərdə tutulur.
Büstün zədələnməsi barədə məlumat sentyabrın 21-də sosial şəbəkələrdə yayılıb. Hadisənin həmin gün səhər saatlarında baş verdiyi bildirilir.
Azərbaycanın Gürcüstandakı səfiri Faiq Quliyev daha əvvəl bildirib ki, hadisə ilə bağlı ehtimal olunan şəxs saxlanılıb. Hazırda Gürcüstan Daxili İşlər Nazirliyi, Dövlət Təhlükəsizliyi Xidməti və digər aidiyyəti qurumlar tərəfindən istintaq və prosessual tədbirlər davam etdirilir.
