Qafqaz Müsəlmanları İdarəsinin sədri, şeyxülislam Allahşükür Paşazadə Azərbaycanın zəfərinin İslam dünyasının zəfəri olduğunu bildirib.
O, bu barədə Ağdam Cümə məscidində keçirilən Seyid Yəhya Bakuviyə həsr olunmuş beynəlxalq elmi-praktiki konfransla əlaqədar tədbirdə danışıb.
Allahşükür Paşazadə qeyd edib ki, Qarabağda çoxsaylı məscidlər olsa da, Ağdam Cümə məscidi onun üçün “şəhid məscidi”dir. O, Birinci Qarabağ müharibəsi zamanı bu məsciddə bir çox şəhidin dəfnində iştirak etdiyini bildirib.
Şeyxülislam Ağdam Cümə məscidinin divarlarının ağır hadisələrin şahidi olduğunu deyib:
“Ağdam Cümə məscidinin divarlarında neçə ananın naləsi var. Bəzən şəhidlərin nəşini analarına, ailələrinə göstərə bilmirdik. Çox ağır zamanlar idi”.
QMİ sədri Birinci Qarabağ müharibəsi və erməni işğalı dövründə Ağdam Cümə məscidi və Qarabağdakı digər məscidlərin təhqir edilməsinə müsəlman dünyasından lazımi dəstəyin göstərilmədiyini bildirib:
“Bizə qardaş, dost deyən insanlar ana harayına gəlmədilər, səsimizi eşitmədilər. Buna çox təəssüf edirəm”.
O, Qarabağın hazırda yenidən qurulduğunu, dini ibadət yerlərinin bərpa edildiyini və yeni məscidlərin tikildiyini qeyd edib.
Allahşükür Paşazadə bildirib ki, dövlət başçısı ilə görüş zamanı Şeyx Seyid Yəhya Bakuvi Şirvaniyə həsr olunmuş konfransın davamının Ağdam Cümə məscidində keçirilməsi barədə fikir səsləndirilib.
“Hesab edirəm ki, Ali Baş Komandanın, Azərbaycanın zəfəri İslam dünyasının zəfəridir”, – deyə QMİ sədri vurğulayıb.
