Daxili İşlər Nazirliyinin (DİN) Kibercinayətkarlıqla Mübarizə Baş İdarəsi sosial şəbəkələrdə bank olmayan kredit təşkilatlarının rəsmi səhifələrinə bənzər saxta səhifələr yaradaraq vətəndaşların bank kartı məlumatlarını ələ keçirən şəxsi saxlayıb.
Kiberpolisin keçirdiyi əməliyyat-texniki tədbirlər nəticəsində bu əməlləri törətməkdə şübhəli bilinən Elcan Cəfərov saxlanılıb.
Araşdırma zamanı müəyyən edilib ki, E.Cəfərov bank olmayan kredit təşkilatlarının rəsmi səhifələrinə vizual olaraq oxşar saxta səhifələr yaradıb və daha çox şəxsi cəlb etmək üçün həmin səhifələri sosial şəbəkələrdə və “WhatsApp” qruplarında reklam edib.
Saxta səhifələrə daxil olan vətəndaşlardan kredit rəsmiləşdirilməsi adı ilə bank kartının nömrəsi, son istifadə tarixi, CVV və OTP təhlükəsizlik kodları əldə edilib. Daha sonra həmin məlumatlardan istifadə edilməklə kartlardakı vəsaitlər başqa şəxslərin hesablarına köçürülərək nağdlaşdırılıb.
Faktla bağlı cinayət işi başlanılıb. E.Cəfərov cinayət məsuliyyətinə cəlb edilib və məhkəmənin qərarı ilə barəsində həbs qətimkan tədbiri seçilib.
DİN vətəndaşlara sosial şəbəkələrdə qarşılarına çıxan kredit elanlarının doğruluğunu yoxlamağı, maliyyə xidmətlərindən istifadə etməzdən əvvəl həmin qurumun qanuni fəaliyyət göstərdiyinə əmin olmağı tövsiyə edir.
Vətəndaşlardan bank kartlarının məlumatlarını, xüsusilə CVV/CVC və OTP kodlarını tanımadıqları şəxslərə və şübhəli internet səhifələrinə təqdim etməmələri xahiş olunur. Rəsmi qurumlar və banklar telefon, mesaj və ya sosial şəbəkələr vasitəsilə PIN-kod, CVV/CVC və OTP kimi məxfi məlumatları tələb etmirlər.
