Yaponiyalı cüdoçu Sansiro Murao Bakıda keçirilən dünya çempionatında yaradılan ab-havadan və azarkeşlərin cüdoya sevgisindən məmnunluğunu ifadə edib.
90 kq çəki dərəcəsində qızıl medal qazanan idmançı Azərbaycanın qonaqpərvər ölkə olduğunu vurğulayıb.
“Bu, mənim Azərbaycana üçüncü səfərimdir. Hər dəfə xoş münasibətlə qarşılaşıram. Milli Gimnastika Arenasındakı ab-hava və insanların cüdoya böyük sevgisi həqiqətən çox xoşdur. Azərbaycanın çox gözəl və qonaqpərvər ölkə olduğunu düşünürəm. Xalqınıza təşəkkür edirəm”.
Murao ardıcıl ikinci dəfə dünya çempionu olmasının sevincini də bölüşüb:
“Mən ötən il də mundialın qalibi olmuşdum və ardıcıl ikinci ildir ki, qızıl medala sahib çıxıram. Təbii ki, bu, sevindirici haldır. Qarşıma qoyduğum məqsədə çatmışam. Ardıcıl qələbələr qazanaraq üstün olduğumu sübut etməyə çalışırdım. Buna nail olduğum üçün xoşbəxtəm”.
Qeyd edək ki, Sansiro Murao finalda həmyerlisi Qoki Tayimaya qalib gəlib. Eyni çəki dərəcəsində mübarizə aparan Azərbaycan təmsilçisi Murad Fətiyev isə bürünc medal qazanıb.
