Oktyabrın 31-də Azərbaycanın əksər ərazilərində arabir yağış yağıb, şimşək çaxıb. Şahdağda isə arabir qar qeydə alınıb.
Milli Hidrometeorologiya Xidmətinin saat 10:00-a olan məlumatına görə, ən çox yağıntı Daşkəsən və Lerik rayonlarında qeydə alınıb. Hər iki ərazidə yağıntının miqdarı 10 mm olub. Biləsuvar və Oğuzda 9 mm, Gədəbəy və Şamaxıda 8 mm, Qobustan, Qəbələ və Astarada 7 mm yağıntı düşüb.
Şahbuz, Tərtər və Kürdirmirdə 6 mm, Bərdə, Şəmkir, Zərdab və Ağstafada 5 mm, Gəncə, Neftçala və İmişlidə 4 mm, Şəki, Yevlax, Tovuz, Zaqatala, Lənkəran, Ağdam, Goranboy və Göygöldə isə 3 mm yağıntı qeydə alınıb.
Bakı və Abşeron yarımadasında, eləcə də bir sıra digər ərazilərdə yağıntının miqdarı 1 mm-dək olub. Qubadlı, Laçın, Şuşa, Xankəndi və Xocalıda da arabir yağış yağıb.
Bundan başqa, Daşkəsən, Ordubad, Göygöl, Şəmkir, Balakən, Qaxın Sarıbaş kəndi, Zaqatala, Qusar, Şəki, Qəbələ, Şamaxı, Qobustan, Göyçay və Lerikdə duman müşahidə olunub. Görünüş məsafəsi 500 metrədək məhdudlaşıb.
