Sabiq əmək və əhalinin sosial müdafiəsi naziri Səlim Müslümovun müsadirə olunan iki mənzilindən biri 5-ci dəfə keçirilən açıq hərracda satılıb.
Məlumata görə, Yasamal rayonu, Mirzə İbrahimov küçəsində yerləşən, 370,4 kvadratmetr sahəsi olan mənzil 50 faiz endirimlə 463 min 125 manata alıcı tapıb.
Mənzili alan şəxsin kimliyi açıqlanmayıb.
Binəqədi rayonu, Akademik Ziya Bünyadov prospektində yerləşən, 61,1 kvadratmetr sahəsi olan ikinci mənzil isə satılmayıb. Həmin mənzil avqustun 18-də 6-cı dəfə hərraca çıxarılacaq və əvvəlki hərracdakı kimi 175 min manata təklif olunacaq.
Xatırladaq ki, Səlim Müslümov 2021-ci ildə Dövlət Təhlükəsizliyi Xidməti tərəfindən saxlanılıb. O, xüsusilə külli miqdarda mənimsəmə, vəzifə səlahiyyətlərindən sui-istifadə və rüşvətalma ittihamları ilə məsuliyyətə cəlb olunub. 13 ay həbsdə qaldıqdan sonra ev dustaqlığına buraxılıb.
