Noyabrın 11-də Moskvada keçiriləcək Kollektiv Təhlükəsizlik Müqaviləsi Təşkilatının (KTMT) sammitində Ermənistanın səs hüququndan məhrum edilməsi məsələsinin müzakirəyə çıxarılması mümkündür.
Bu barədə Rusiyanın xarici işlər nazirinin müavini Mixail Qaluzin TASS-a müsahibəsində bildirib.
Onun sözlərinə görə, KTMT-yə üzv dövlətlərə qarşı məhdudlaşdırıcı tədbirlərin tətbiqi ilə bağlı qərarlar təşkilatın nizamnaməsinə uyğun olaraq qəbul edilə bilər.
Qaluzin qeyd edib ki, KTMT Nizamnaməsi beynəlxalq müqavilədir və bütün üzv dövlətlər təşkilatın fəaliyyətinin maliyyələşdirilməsi ilə bağlı öhdəliklərini yerinə yetirməlidirlər.
Diplomatın sözlərinə görə, Ermənistanın KTMT-nin fəaliyyətində iştirak etməməsi və təşkilatın büdcəsi ilə bağlı illik qərarları imzalamaması onun öz hüququndan istifadə etməməsi deməkdir. Lakin bu, İrəvanı üzvlük haqqını ödəmək öhdəliyindən azad etmir.
Qaluzin əlavə edib ki, beynəlxalq təşkilatlarda institusional səmərəliliyin qorunması məqsədilə bu cür hallar üçün təsis sənədlərində müvafiq prosedurlar nəzərdə tutulur.
