Azərbaycanda rəsmi səfərdə olan Laos Xalq Demokratik Respublikasının Prezidenti Thonqlun Sisulit oktyabrın 14-də “Yanardağ” Dövlət Tarix-Mədəniyyət və Təbiət Qoruğunu ziyarət edib.
Qonağa qoruğun tarixi və təbii xüsusiyyətləri barədə ətraflı məlumat verilib.
Bildirilib ki, təxminən 14 metr uzunluğunda zolaqda torpağın dərinliklərində gedən tektonik proseslər nəticəsində bərk süxurlarda yaranan çatlardan sızan təbii qazın alışması “Yanardağ”ı əmələ gətirib. Dünyada belə təbii qaz yanma mənbələrinin bir neçəsinin olduğu, onların əksəriyyətinin isə Azərbaycanda yerləşdiyi diqqətə çatdırılıb.
Qoruğun ərazisində əbədiyaşar alov təbiət abidəsi ilə yanaşı, digər maddi-mədəni irs nümunələrinin və təbiət abidələrinin də qorunduğu bildirilib.
Qeyd olunub ki, “Yanardağ” və Abşeronun digər əraziləri qədim dövrlərdən atəşpərəstlik və zərdüştlük dinlərinə etiqad edənlər tərəfindən müqəddəs sayılıb. Ərazi son Paleolit dövründən etibarən insanların sıx məskunlaşdığı yerlərdən biri olub. “Yanardağ” ətrafında aşkar edilmiş qaval daşı və digər qədim maddi-mədəniyyət nümunələri bunun sübutu kimi göstərilib.
Laos Prezidenti, həmçinin qoruğun ərazisində fəaliyyət göstərən əl işləri sərgisi ilə tanış olub. Sonda qarşılıqlı hədiyyələr təqdim edilib.
