Rusiyanın Pskov vilayətinin Dno rayonunda aparılan axtarış ekspedisiyası zamanı təxminən 250 nəfərin qalıqları aşkarlanıb. Böyük Vətən müharibəsi illərində ərazidə nasist konslageri yerləşib.
Qazıntılar “Tələbə yaddaş növbəsi: Şimal-Qərb cəbhəsi” adlı XV regionlararası ekspedisiya çərçivəsində aparılıb. Axtarış işləri artıq başa çatıb.
Aşkarlanan medalyonlar və şəxsi əşyalar vasitəsilə altı hərbçinin kimliyini ilkin olaraq müəyyənləşdirmək mümkün olub. Ekspertiza başa çatdıqdan sonra onların qohumlarının axtarışına başlanılacaq.
Zəruri prosedurlar tamamlandıqdan sonra hərbçilərin və mülki şəxslərin qalıqlarının kütləvi məzarlıqda ehtiramla dəfn edilməsi planlaşdırılır.
Ekspedisiya zamanı toplanan materiallar soyqırımı işi üzrə araşdırmaya əlavə olunması üçün “Müddəti olmayan tarix” layihəsi çərçivəsində Rusiya İstintaq Komitəsinə təqdim edilib.
