Rusiyanın Maqadan şəhərində ayı qəbiristanlıqda məzarlardan birini qazaraq qadının meyitini aparıb.
Hadisə ailənin fevralın sonlarında vəfat etmiş qohumunun məzarını ziyarət etmək üçün qəbiristanlığa getməsi zamanı üzə çıxıb. Onlar məzarın qazıldığını və ətrafındakı hasarın sındırıldığını görüblər. Qadının meyiti isə qəbirdə olmayıb. Ərazidə yalnız paltar qalıqları aşkarlanıb.
Qəbiristanlıqdan təxminən 300 metr məsafədə, meşəlik ərazidə axtarış aparan qohumlar 10-a yaxın kəllə və çoxlu sayda sümük tapıblar. Qəbir və qəbiristanlıq ərazisinə baxış zamanı iri ayının izləri də aşkarlanıb.
İlkin ehtimala görə, yırtıcı uzun müddətdir həmin ərazidə məskunlaşıb və digər qəbirləri də qazmış ola bilər.
Ailə hadisə ilə bağlı polisə və Maqadan meriyasına müraciət edib. Ayının ərazidə peyda olması ilə bağlı hansı tədbirlərin görüləcəyinə hakimiyyət orqanları qərar verəcək.
