İran ABŞ və İsrailin ölkə ərazisindəki raket istehsalı müəssisələrinə endirdiyi zərbələrdən sonra yeraltı zavodlarda ballistik raketlərin istehsalını yenidən bərpa edib.
“The Wall Street Journal” ABŞ və Yaxın Şərq rəsmilərinə istinadən yazır ki, İran əvvəlcədən topladığı komponentlərdən istifadə etməklə yeraltı müəssisələrdə raketlərin yığılmasına başlayıb.
Məlumata görə, Tehranın şərqində yerləşən Xocir də daxil olmaqla bir sıra yeraltı obyektlərdə aktivlik müşahidə olunur. Burada həm buraxılışdan əvvəl yanacaqla doldurulması tələb olunan, həm də döyüşə hazır vəziyyətdə olan raketlər yığılır.
İranın raket istehsalı üçün yeni yeraltı komplekslər inşa etməyə çalışdığı da bildirilir.
ABŞ və regional rəsmilərin qiymətləndirməsinə görə, Tehran hazırda əsasən fevral ayında ehtiyatda saxladığı hissələrdən istifadə edir. ABŞ rəsmilərindən biri İranın ən azı 200 raket yığmaq imkanına malik olduğunu bildirib.
