Türkiyə və Rusiyanın Xarici İşlər nazirlikləri Cənubi Qafqazdakı vəziyyəti, Mərkəzi Asiyada əməkdaşlığın inkişafını və Rusiya-Ukrayna münaqişəsini müzakirə edib.
Bu barədə Rusiya Xarici İşlər Nazirliyi məlumat yayıb. Sentyabrın 8-9-da Moskvada keçirilən məsləhətləşmələrdə Türkiyəni Şərqi Avropa və Cənubi Qafqaz üzrə Baş idarənin rəisi, səfir Mehmet Samsar, Rusiyanı isə xarici işlər nazirinin müavini Mixail Qaluzin təmsil edib.
Tərəflər Mərkəzi Asiya və Cənubi Qafqazda yeni parçalanma xətləri yarada biləcək kənar təşəbbüslərin yolverilməz olduğunu vurğulayıblar.
Bəyanatda qeyd olunub: “Tərəflər ‘3+3’ Regional Əməkdaşlıq Platformasının ritmik işinin davam etdirilməsində maraqlıdırlar”. Platformaya Azərbaycan, Ermənistan, Gürcüstan, Rusiya, İran və Türkiyə daxildir.
Görüşlərdə Ukrayna məsələsi də müzakirə olunub. Rusiya tərəfi Moskvanın münaqişənin həlli ilə bağlı yanaşmalarını Türkiyəyə çatdırıb və Qara dənizdə Ukraynanın fəaliyyətlərinin, Rusiya tərəfinin qiymətləndirməsinə görə, gəmiçiliyin təhlükəsizliyinə təhdid yaratdığını bildirib.
