Rusiya ilə Şimali Koreya arasında ilk avtomobil körpüsü istifadəyə verilib.
Tumen çayı üzərində inşa edilən körpü Rusiyanın Xasan şəhəri ilə Şimali Koreyanın Tumangan ərazisini birləşdirir. Təxminən 1 kilometr uzunluğunda olan körpü iki hərəkət zolağına malikdir.
Körpünün açılışı sentyabrın 7-də baş tutub. Mərasimdə Rusiya Baş naziri Mixail Mişustin və Şimali Koreyanın Baş naziri Pak Tae Son videobağlantı vasitəsilə çıxış ediblər. Mişustin layihəni iki ölkə arasında münasibətlərin inkişafına təkan verəcək “tarixi hadisə” və yeni dostluq rəmzi kimi qiymətləndirib.
Yeni körpü gündəlik 300-dək nəqliyyat vasitəsinin keçidi üçün nəzərdə tutulub. Rusiya hökumətinin məlumatına görə, yük maşınları artıq körpüdən istifadə etməyə başlayıb. Sərnişin daşımalarının isə ilin sonunadək mümkün olacağı gözlənilir.
Yeni keçid Moskva ilə Pxenyan arasında son illərdə sürətlənən iqtisadi və strateji əməkdaşlığın fonunda açılıb. Xarici ekspertlər körpünün ticarət və nəqliyyat əlaqələrini genişləndirməklə yanaşı, iki ölkə arasında logistikanı, o cümlədən hərbi təyinatlı yüklərin daşınmasını asanlaşdıra biləcəyini də bildirirlər.
