Qızılağac Milli Parkının ərazisində qanunsuz ov edən şəxslər saxlanılıblar.
Daxili İşlər Nazirliyinin Su Nəqliyyatında Polis İdarəsinin Lənkəran Xətt Polis Şöbəsinin əməkdaşlarının keçirdikləri tədbirlər nəticəsində milli parkın su hövzəsində qanunsuz balıq ovu ilə məşğul olan İ. Əhmədov saxlanılıb. Onun üzərinə baxış zamanı müxtəlif növ balıqlar və qadağan olunmuş ov alətləri aşkarlanıb.
Digər tədbir zamanı isə qoruğun ərazisində qanunsuz ov edən E. Eynalov, R. Eynalov, E. Əzizov və İ. Eynalov saxlanılıblar. Həmin şəxslərdən müvafiq sənədləri olmayan 4 ov silahı və qanunsuz ovlandığı bildirilən, “Qırmızı Kitab”a daxil edilmiş müxtəlif növ 72 çöl quşu aşkarlanıb.
Faktlarla bağlı araşdırma aparılır.
Su bioresurslarının mühafizəsi və ekoloji tarazlığın qorunması məqsədilə polis əməkdaşları aidiyyəti dövlət qurumları ilə birgə nəzarət-profilaktik tədbirləri davam etdirirlər.
