Qarabağ və Şərqi Zəngəzur iqtisadi rayonlarının ilkin qiymətləndirmələrə əsasən, 1 milyondan çox mina ilə çirkləndirildiyi müəyyənləşdirilib.
Bunu ANAMA İdarə Heyətinin sədri Vüqar Süleymanov açıqlayıb.
Onun sözlərinə görə, mina təhlükəsi yalnız partlayıcı qurğularla məhdudlaşmır, torpağa, suya, biomüxtəlifliyə və bütövlükdə ekosistemə təsir edir. Minalar həmçinin işğaldan azad edilmiş ərazilərdə yolların, yaşayış məntəqələrinin və evlərin tikintisini gecikdirir.
Süleymanov qeyd edib ki, 44 günlük Vətən müharibəsindən sonra ANAMA və digər qurumlar tərəfindən 300 565 hektar ərazi təmizlənib, 261 705 mina və digər partlayıcı sursat zərərsizləşdirilib.
Onun sözlərinə görə, təmizlənən ərazilər kənd təsərrüfatı, yaşayış və energetika infrastrukturu, eləcə də meşələrin, su hövzələrinin və digər ekoloji ərazilərin bərpası üçün istifadə olunur.
