Azərbaycan Prezidenti İlham Əliyev və Ermənistanın Baş naziri Nikol Paşinyan davamlı sülhün möhkəmləndirilməsi, dövlətlərarası münasibətlərin normallaşdırılması və bağlantıların gücləndirilməsi istiqamətində birbaşa ikitərəfli təmasların davam etdirilməsi barədə razılığa gəliblər.
Liderlər 2025-ci il 8 avqust tarixli Vaşinqton Sülh Zirvə görüşünün, ABŞ Prezidenti Donald Trampın şahidliyi ilə imzalanmış Birgə Bəyannamənin, həmçinin “Azərbaycan Respublikası ilə Ermənistan Respublikası arasında sülhün və dövlətlərarası münasibətlərin təsis olunması haqqında Saziş”in razılaşdırılmış mətninin paraflanmasının tarixi əhəmiyyətini vurğulayıblar.
Azərbaycanın neft məhsullarının Ermənistana ixracı, üçüncü ölkələrdən taxıl və digər əmtəələrin Azərbaycan ərazisi ilə Ermənistana tranziti, eləcə də iki ölkə arasında ticarət əlaqələrinin qurulması sülh dividendlərinin mühüm təzahürü kimi qeyd olunub.
Liderlər işgüzar dairələr arasında təmasları alqışlayıb, qarşılıqlı faydalı iqtisadi, ticarət və enerji əməkdaşlığının genişləndirilməsi imkanlarını müzakirə ediblər.
Tərəflər Azərbaycan-Ermənistan dövlət sərhədinin delimitasiyası üzrə müvafiq dövlət komissiyalarının rolunu qeyd edib və onların əldə olunmuş razılaşmalara uyğun fəaliyyətlərini davam etdirməsinin vacibliyini vurğulayıblar.
İlham Əliyev və Nikol Paşinyan Vaşinqton Sülh Zirvə görüşünün mühüm nəticələrindən biri olan “Beynəlxalq Sülh və Rifah naminə Tramp Marşrutu”nun (TRIPP) həyata keçirilməsi ilə bağlı növbəti praktiki addımları da müzakirə ediblər.
Bundan əlavə, parlamentarilər və vətəndaş cəmiyyəti nümayəndələrinin etimad quruculuğuna və sülh gündəliyinin dəstəklənməsinə verdikləri töhfələr müsbət qiymətləndirilib.
