Kambocanın Baş naziri Hun Manetin Azərbaycana səfəri məhsuldar olacaq və o, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) sammitində iştirak edəcək.
Azərbaycan Prezidenti İlham Əliyev bunu Bakıda Kambocanın Baş naziri ilə mətbuat üçün birgə bəyanatla çıxış edərkən deyib.
“Əminəm ki, bu səfər Sizin üçün səmərəli və xoş olacaq. Siz Azərbaycanda bir neçə gün keçirəcəksiniz, həmçinin qarşıdakı AQEM sammitində iştirak edəcəksiniz. Sizin bu tədbirə şəxsən qatılmağınız bizim üçün böyük şərəfdir. Həmçinin keçmiş baş nazir, hazırda isə Senat sədri olan atanızla görüşdükdən sonra Sizi burada, Azərbaycanda qəbul etmək bizim üçün böyük şərəfdir”, – İlham Əliyev bildirib.
Prezidentin sözlərinə görə, Kamboca Baş nazirinin Azərbaycana səfəri ikitərəfli əməkdaşlıq siyasətinin davamıdır.
