Azərbaycan Prezidenti İlham Əliyev sentyabrın 26-da Beynəlxalq Xizək və Snoubord Federasiyasının Prezidenti Aleksandr Oşpelt ilə görüşüb.
Görüşdə Azərbaycanın beynəlxalq əhəmiyyətli idman tədbirlərinə, o cümlədən qış idman növləri üzrə yarışlara uğurla ev sahibliyi etdiyi qeyd olunub. Bakıda keçirilən Formula 1 yarışlarının da yüksək səviyyədə təşkil edildiyi vurğulanıb.
Azərbaycanda müasir qış-xizək infrastrukturunun yaradıldığı bildirilib. Qeyd olunub ki, Beynəlxalq Xizək və Snoubord Federasiyasının xətti ilə “Şahdağ” Turizm Mərkəzində bir sıra nüfuzlu yarışların keçirilməsi nəzərdə tutulur.
Görüşdə ötən il Azərbaycan Dövlət Turizm Agentliyi ilə Beynəlxalq Xizək və Snoubord Federasiyası arasında imzalanmış tərəfdaşlıq müqaviləsinin ölkədə qış turizmi və qış idman növləri üzrə potensialın inkişaf etdirilməsində rolu da qeyd edilib.
Tərəflər Azərbaycan ilə Federasiya arasında əməkdaşlığın perspektivləri barədə fikir mübadiləsi aparıblar.
