Polşanın Daxili Təhlükəsizlik Agentliyi məktəbə və məscidə hücum hazırlamaqda şübhəli bilinən 17 yaşlı Pavel Q.-nı saxlayıb.
Axtarış zamanı onun üzərində soyuq silah və nasist simvolları olan materialların aşkarlandığı bildirilir.
Yeniyetmə terror fəaliyyəti, faşizm və nasizmi təbliğ edən mütəşəkkil cinayətkar qruplaşmada iştirak, həmçinin milli, etnik, irqi və dini mənsubiyyətə görə nifrətin qızışdırılması ilə bağlı ittihamlarla üzləşib.
İttihamların digər bəndinin bir neçə nəfərin qətlə yetirilməsinə hazırlıqla bağlı olduğu bildirilir. İstintaqın məlumatına görə, şübhəli şəxs silah, döyüş sursatı və hərbi ləvazimat almağı planlaşdırıb.
Onun mənzilində aparılan axtarış zamanı bıçaqlar, tüfəng süngüsü, kitablar və üzərində faşist və nasist simvolları olan digər materialların aşkarlandığı qeyd olunur.
Yeniyetmənin elektron cihazlarında isə məktəbə və məscidə hücum planlarının, eləcə də silah, döyüş sursatı və hərbi ləvazimatların alınmasının müzakirə edildiyi yazışmaların tapıldığı bildirilir.
Pavel Q. ittihamları qəbul etməyib və ifadə verməkdən imtina edib. Məhkəmənin qərarı ilə o, üç ay müddətinə həbs edilib.
Təqsiri məhkəmədə sübuta yetiriləcəyi təqdirdə onu 15 ilədək azadlıqdan məhrumetmə cəzası gözləyir.
