Polşa Prezidenti Karol Navrotskinin Konstitusiya Tribunalının binasına daxil olmasına mane olmaq cəhdi onun toxunulmazlığının pozulması kimi qiymətləndirilib.
Bu barədə Polşa Prezidentinin mətbuat katibi Rafal Leşkeviç “X” sosial şəbəkəsində bildirib.
“Konstitusiya Tribunalının hakimi Matey Berek indicə cinayət əməlinin törədilməsini sənədləşdirib. Qəsbkarlar prezidentin Konstitusiya Tribunalına daxil olmasına mane olmağa çalışaraq onun toxunulmazlığını pozublar”, – mətbuat katibi yazıb.
Bundan əvvəl Berek bir qrup kişinin prezidentin məhkəmə binasına daxil olmasına mane olmağa çalışdığını əks etdirən video yayımlayıb. Kadrlarda Navrotskinin içəri keçmək istəyərkən həmin şəxslər tərəfindən saxlanıldığı görünür.
Daha sonra prezidentin Aparat rəhbəri Pavel Şefernaker Navrotskinin Konstitusiya Tribunalının binasına daxil olduğunu bildirib. Məlumata görə, onu Polşa Ali Məhkəməsinin birinci sədri Zbiqnev Klapinski müşayiət edib.
“Onet” portalı isə Navrotskinin Prezident Sarayında Konstitusiya Tribunalının sədri Boqdan Sventyçkovski ilə görüşdüyünü iddia edib. Sventyçkovski bundan əvvəl tutduğu vəzifədən müvəqqəti kənarlaşdırılıb. Bu qərardan sonra məhkəmə binası qarşısında vəziyyət gərginləşib.
