Ermənistanın Baş naziri Nikol Paşinyan ölkədə istehsal olunan qida məhsullarının keyfiyyətindən və iqtisadi əlaqələrin şaxələndirilməsi tempindən narazı olduğunu bildirib.
Hökumətin iclasında çıxış edən Paşinyan deyib ki, dövlət tərəfindən təsərrüfat subyektlərinə geniş imkanlar yaradılmasına baxmayaraq, iqtisadi əlaqələrin şaxələndirilməsi gözlənilən nəticəni verməyib.
Onun sözlərinə görə, bunun əsas səbəbi standartların, səmərəliliyin və məhsuldarlığın artırılması istiqamətində yetərli irəliləyişin olmamasıdır.
Paşinyan ölkədə istehsal olunan qida məhsullarının keyfiyyətinə də toxunaraq, uzun müddətdir yetişdirilən balıqdan istifadə etmədiyini açıqlayıb.
“Bu məsələdə problem olduğu mənə aydındır. Bu balıqda qeyri-təbii, anlaşılmaz yağa rast gəlinir”, – deyə o bildirib.
Baş nazir vurğulayıb ki, hökumət balıqçılıq və digər sahələrin inkişafını dəstəkləməyə hazırdır, lakin qida məhsullarının keyfiyyət standartları ilə bağlı problemlər həll olunmalıdır.
Paşinyan, həmçinin Ermənistan məhsullarının bir qisminin Rusiyaya ixracına qoyulan qadağaya münasibət bildirərək qeyd edib ki, bir çoxları bunu böhran kimi qiymətləndirsə də, o bunu yeni imkan kimi görür.
