Nobel Fondu 2026-cı ildə laureatlara veriləcək pul mükafatının məbləğini 9 faiz artıraraq hər kateqoriya üzrə 12 milyon İsveç kronuna, təxminən 1,22 milyon dollara çatdıracaq.
Nobel Fondunun icraçı direktoru Hanna Stjärne bildirib ki, mükafat məbləğinin artırılması Nobel mükafatının uzunmüddətli əhəmiyyətinin qorunmasına və onun maliyyə hissəsinin zamanla öz dəyərini saxlamasına xidmət edir.
2026-cı il Nobel mükafatlarının qalibləri fizika, kimya, sülh, ədəbiyyat, iqtisadiyyat, eləcə də fiziologiya və ya tibb sahələri üzrə oktyabrın 5-dən 12-dək açıqlanacaq. Bu il Nobel mükafatlarının ilk dəfə təqdim edilməsinin 125-ci ildönümü qeyd olunur.
Nobel mükafatı XIX əsrdə yaşamış isveçli sahibkar və dinamiti ixtira edən Alfred Nobelin vəsiyyətinə əsasən təsis edilib. İlk Nobel mükafatları 1901-ci ildə təqdim olunub. Həmin vaxt hər kateqoriya üzrə mükafat məbləği 150 782 İsveç kronu təşkil edib.
