Narkoterrorizm, silah və narkotik qaçaqmalçılığında ittiham olunan Venesuelanın sabiq rəhbəri Nikolas Maduronun işi üzrə məhkəmə prosesi bu gün Nyu-Yorkda keçiriləcək.
“RİA Novosti”nin məlumatına görə, məhkəmə iclası əvvəlcə iyunun 30-na təyin olunsa da, prokurorluğun vəsatəti əsasında iyulun 22-dək təxirə salınıb.
Prokuror Cey Kleyton qərarın logistika, planlaşdırma və təhlükəsizlik tədbirlərinin gücləndirilməsi zərurəti ilə bağlı olduğunu bildirib. Vəsatət Nyu-Yorkun Cənub Dairə Məhkəməsinin hakimi Elvin Hellerştayn tərəfindən təmin edilib.
Xatırladaq ki, Nikolas Maduro və həyat yoldaşı Siliya Flores bu ilin yanvarında ABŞ tərəfindən keçirilən əməliyyat zamanı saxlanılaraq Nyu-Yorka aparılıb. ABŞ Prezidenti Donald Tramp onların narkoterrorizm və ABŞ-yə təhdid yaratmaq ittihamları ilə mühakimə olunacağını açıqlamışdı.
