Nepalda daşqınlar zamanı itkin düşdüyü bildirilən Çandika Kumari Şrestha 10 gün sonra sağ tapılıb.
Xilasedicilər qadını Betrawati kəndində dağılmış dördmərtəbəli evinin içində, su və palçıq arasında yaranmış kiçik hava boşluğunda aşkar ediblər. Polis əməkdaşı Mahendra Darnalın sözlərinə görə, xilasedicilər qadının “Məni xilas edin!” deyə səsləndiyini eşidiblər. 45 dəqiqə davam edən əməliyyat nəticəsində Şresta xilas edilərək hərbi xəstəxanaya aparılıb.
Qeyd edək ki, ailəsi onun öldüyünü düşünərək yas mərasiminə başlayıb.
Xatırladaq ki, avqustun 26-da Lanqtanq-Lirunq dağında buzlaq çökərək daşqına səbəb olub. Hadisə nəticəsində 1 300-dən çox insan ölüb, daha 5 000 nəfər itkin düşüb. Qeyd olunur ki, 274 əcnəbi də daxil olmaqla 13 mindən çox insan xilas edilib
