Azərbaycanda dövlət ümumi təhsil müəssisələrində çalışan müəllimlər üçün geyimlə bağlı vahid tələblər müəyyən ediləcək.
Bu, Prezident İlham Əliyevin təsdiqlədiyi “Ümumi təhsil haqqında” qanuna edilən dəyişiklikdə əksini tapıb.
Dəyişikliyə əsasən, dövlət ümumi təhsil müəssisələrində təhsilverənlərin geyim tələbləri müvafiq icra hakimiyyəti orqanının müəyyən etdiyi qurum tərəfindən təsdiqlənəcək.
Qanuna edilən digər dəyişikliklə valideynlərin və ya digər qanuni nümayəndələrin vəzifələri sırasına övladlarının dövlət ümumi təhsil müəssisələrində müəyyən olunmuş geyim tələblərinə əməl etməsini təmin etmək də daxil edilib.
