Rusiyanın Moskva şəhərindəki Jukovski və Domodedovo hava limanlarında uçuşların qəbulu və yola salınması dayandırılıb. Şeremetyevo və Vnukovo hava limanlarında isə reyslər aidiyyəti qurumlarla razılaşdırıldıqdan sonra həyata keçirilir.
Rusiya Federal Hava Nəqliyyatı Agentliyinin (“Rosaviasiya”) məlumatına görə, məhdudiyyətlər uçuşların təhlükəsizliyini təmin etmək məqsədilə tətbiq edilib.
Bildirilib ki, məhdudiyyətlər Vnukovo hava limanında iki saatdan çox, Domodedovo və Jukovskidə təxminən bir saat, Şeremetyevoda isə 40 dəqiqədir qüvvədədir.
Bu müddət ərzində Moskva yaxınlığında 7 pilotsuz uçuş aparatı vurulub. Hazırda hadisə nəticəsində ölən və ya xəsarət alanlar, eləcə də hər hansı dağıntı barədə məlumat yoxdur.
