Ermənistanın Baş naziri Nikol Paşinyanın ölkənin Rusiyadakı fövqəladə və səlahiyyətli səfiri Qurgen Arsenyanı geri çağırmaq qərarına gəldiyi bildirilir.
Bu barədə Ermənistanın “Joxovurd” qəzeti hökumətdəki mənbələrinə istinadən məlumat yayıb. Nəşrin məlumatına görə, Paşinyan səfirin fəaliyyətindən, xüsusilə də Ermənistan-Rusiya münasibətlərində yaranmış gərginliyin aradan qaldırılmamasından narazıdır.
Qeyd olunub ki, Arsenyanın yerinə kimin təyin olunacağı hələlik bəlli deyil və konkret namizəd müəyyənləşdirilməyib.
Məsəslə ilə bağlı Ermənistanın Xarici İşlər Nazirliyi rəsmi açıqlama verməyib. Nazirlik sorğunun səlahiyyətlərinə aid olmadığını bildirib. Ermənistan prezidentinin administrasiyası isə sorğunun hökumətə yönləndirilməsini tövsiyə edib. Baş nazirin mətbuat katibi də məsələyə münasibət bildirməkdən çəkinib.
