Argentina millisinin kapitanı Lionel Messi illər öncə İspaniya yığmasının hücumçusu Lamin Yamalı körpə ikən çimizdirdiyi fotonu futbol tarixinin ən maraqlı təsadüflərindən biri adlandırıb.
Messi mətbuat konfransında bildirib ki, həmin şəkil UNİCEF-in layihələrindən biri çərçivəsində, Yamal hələ bir neçə aylıq olarkən çəkilib.
“Bu kadrlar həqiqətən də ağlasığmazdır. Mən onunla hələ körpə olanda bu şəkli çəkdirmişdim, indi isə dünya çempionatında qalib gəlmək üçün qarşı-qarşıya gələcəyik. Bu, doğrudan da inanılmaz bir hadisədir”, – deyə Messi bildirib.
Argentina millisinin lideri Yamalın hazırda dünyanın ən güclü futbolçularından biri olduğunu vurğulayıb və ona gələcək karyerasında uğurlar arzulayıb.
Messi qeyd edib ki, finalda məqsədləri yalnız Lamin Yamalı deyil, bütövlükdə İspaniya millisini dayandırmaq olacaq.
Xatırladaq ki, 2026-cı il dünya çempionatının finalında Argentina və İspaniya milliləri qarşılaşacaq. Oyun iyulun 19-da ABŞ-nin Nyu-Cersi ştatının İst-Raterford şəhərində keçiriləcək və Bakı vaxtı ilə saat 23:00-da başlayacaq.
