Ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul üzrə ixtisas seçimi avqustun 3-dən 9-dək (saat 23:59-dək) internet üzərindən aparılacaq.
İxtisas seçimi mərhələsində abituriyentlər qəbul olmaq istədikləri ixtisasların kodlarını elektron ərizəyə daxil edib təsdiqləməlidirlər.
Müsabiqəyə ümumi balı 50-dən, Azərbaycan dili və ya rus dili üzrə balı 20-dən, riyaziyyat üzrə balı isə 10-dan az olmayan abituriyentlər buraxılır. Xüsusi qabiliyyət tələb edən ixtisaslar üzrə isə ümumi balı 50-dən az olmayan və qabiliyyət imtahanından “məqbul” alan namizədlər iştirak edə bilərlər.
Hər bir abituriyent dövlət sifarişli və ödənişli əsaslarla müxtəlif təhsil müəssisələri üzrə 12-yə qədər ixtisas seçə bilər. Yerləşdirmə seçilmiş ixtisasların ardıcıllığı nəzərə alınmaqla həyata keçiriləcək.
2026/2027-ci tədris ili üçün kolleclərə qəbul üzrə 6210 plan yeri ayrılıb. Bu il 24 545 abituriyent ixtisas seçiminə buraxılıb. Ötən il bu göstərici 24 059 nəfər olub. Həmçinin müsabiqə şərtini ödəyib, lakin ərizə qəbulu zamanı qeydiyyatdan keçməyən abituriyentlər də avqustun 3–9-u tarixlərində qeydiyyatdan keçərək ixtisas seçimində iştirak edə biləcəklər.
