İranda Məşrutə hərəkatının növbəti ildönümü münasibətilə Təbriz Günü qeyd olunub.
Bu münasibətlə İran hökumətinin sözçüsü Fatimə Mühacirani Güney Azərbaycana müraciət ünvanlayaraq bölgəni “İran tarixinin açıq kitabı, azadlıq, qeyrət və sivilizasiya məktəbi” adlandırıb.
O, Güney Azərbaycanın İran mədəniyyətinin formalaşmasında mühüm rol oynadığını vurğulayaraq Səttarxan və Bağırxanın xatirəsini yad edib.
“Milli sərkərdə Səttarxanın və milli rəhbər Bağırxanın torpağı əbədi dastanların izlərini təqvimin hər səhifəsində görmək mümkün olan torpaqdır. Təbriz həmişə ilk nailiyyətlər şəhəri olub. Ölkənin mədəniyyət, təhsil, idman və incəsənət sahəsində bir çox inkişaf mərhələlərinin ilk addımları məhz bu torpaqda atılıb”, – deyə müraciətdə bildirilib.
Qeyd edək ki, 1905–1911-ci illərdə Səttarxan və Bağırxanın rəhbərliyi ilə baş verən Məşrutə hərəkatı nəticəsində İranda parlamentarizmin əsası qoyulub. 1906-cı ilin avqustunda Müzəfərəddin Şah Qacar ölkə tarixinin ilk konstitusiyasını təsdiqləyib.
