Ukraynalıların əksəriyyəti ABŞ və Avropa ölkələrinin təhlükəsizlik zəmanətləri müqabilində Donbasın Rusiyaya verilməsinə qarşı çıxır.
Kiyev Beynəlxalq Sosiologiya İnstitutunun keçirdiyi sorğuya əsasən, respondentlərin 60%-i bu ssenarini qəbuledilməz hesab edir. Sorğuda iştirak edənlərin 33%-i belə bir razılaşmanı dəstəkləməyə hazır olduğunu bildirib, 7%-i isə cavab verməkdə çətinlik çəkib.
Eyni zamanda, iştirakçıların 59%-i əhəmiyyətli maliyyə və silah dəstəyi müqabilində müharibənin hazırkı cəbhə xətti boyunca dondurulmasını mümkün variant sayır. Bu ssenarinin əleyhinə çıxanların payı 31% olub.
Sorğu iştirakçılarının 77%-i Rusiyanın irəliləyişlərinə baxmayaraq ağır itkilər verdiyini və Ukraynanın müqaviməti davam etdirmək gücündə olduğunu düşünür. Cəmi 12% vəziyyəti ümidsiz hesab edir.
Araşdırma göstərib ki, ukraynalıların böyük hissəsi müharibənin yaxın vaxtlarda başa çatacağına inanmır. Respondentlərin 45%-i münaqişənin ən azı 2027-ci ilin ikinci yarısına qədər davam edəcəyini gözləyir.
Sorğu 20 iyul–3 avqust tarixlərində Ukraynanın işğal altında olmayan ərazilərində yaşayan 974 nəfər arasında telefon müsahibəsi üsulu ilə keçirilib.
