Baş Dövlət Yol Polisi İdarəsi həftəsonu səfərə hazırlaşan sürücüləri nasaz avtomobillərlə yola çıxmamağa çağırıb.
Qurumdan bildirilib ki, hazırda ölkədə mövsümə xas yağışlı və dumanlı hava şəraiti müşahidə olunur. Bu amillər yol hərəkəti təhlükəsizliyinə birbaşa təsir göstərir.
Qeyd olunub ki, gecə və səhər saatlarında duman və çiskin yollarda görünüş məsafəsini əhəmiyyətli dərəcədə azaldır. Həmçinin şənbə və bazar günləri avtomobil yollarında hərəkət intensivliyinin artacağı gözlənilir.
Baş Dövlət Yol Polisi İdarəsi sürücülərə əlverişsiz hava şəraitində daha diqqətli olmağı, sürəti yol şəraitinə uyğun seçməyi, nasaz nəqliyyat vasitələri ilə yola çıxmamağı tövsiyə edib.
Qurum, həmçinin dayanma, durma, parklanma, ötmə və manevr zamanı təhlükəsizlik qaydalarına ciddi əməl etməyin vacibliyini vurğulayıb.
