Fransada ölkə üzrə davam edən meşə yanğınlarının söndürülməsi əməliyyatlarına Silahlı Qüvvələrin təxminən 2 000 hərbi qulluqçusu cəlb olunub.
Bunu Fransa Silahlı Qüvvələri Nazirliyinin nümayəndəsi Alis Rufo BFMTV telekanalının efirində bildirib.
Onun sözlərinə görə, ehtiyatda yanğınlarla mübarizəyə cəlb oluna biləcək daha 2 000 hərbçi saxlanılır. Mühəndis bölmələri də yanğınsöndürmə əməliyyatlarında iştirak edir.
A.Rufo bildirib ki, yanğınlarla mübarizədə yeni texniki imkanlardan da istifadə olunur. Belə ki, “Airbus A400M” təyyarələri, “Reaper” pilotsuz uçuş aparatları və helikopterlər əməliyyatlara cəlb edilib.
Qeyd edək ki, Fransada meşə yanğınlarının söndürülməsində ənənəvi olaraq “Bombardier 415” amfibiya təyyarələrindən də istifadə olunur.
Son həftələrdə Avropanın bir sıra ölkələrində anomal isti hava və quraqlıq müşahidə olunur. Bu amillər meşə yanğınlarının geniş yayılmasına səbəb olub. Xüsusilə Aralıq dənizi sahillərində vəziyyət daha ağırdır. Yanğınlar minlərlə hektar meşə sahəsini məhv edib, sakinlərin və turistlərin təxliyəsinə səbəb olub.
Yanğınlarla mübarizə məqsədilə Avropa İttifaqına üzv bir sıra ölkələrdən də yüzlərlə yanğınsöndürən və xüsusi aviasiya vasitələri səfərbər edilib.
